كانون شهر الخيرات
جورج أيوب…
انشالله تشتي تلج تايعيدو الأرزات
وينزل خزين الأرض من ربنا هديي
والناس تلزم بيوتا تشغِّل الفحمات
ونبيد مر وحلو بمازات مشويي
كانون شهر المطر شهر البرد بالذات
جدّي وجدّك بيقولو اليوم شتويي
والغيم جَمَّعْ جيوشو بدعم آليات
تبرق وترعد دني مدافع سماويي
والبرد نَفَّذْ أوامر بعَثْ دوريات
ما عاد تغرق معو عاشطوط بحريي
والموج طالع جنونو والمراكب جات
منها مشلّع ومنها بعيد مريي
هيدا بعمرو الشتي ما غيَّر العادات
تشرين عرّى الشجر، كانون بالغيمات
يحجب نجوم السما بسهرات قمريي